ஓய்வுக்கால நிதியை உருவாக்குவது எப்படி?

கண்ணில் படாத விஷயம் எளிதில் மறந்துவிடும் என்று சொல்வார்கள். நமது அன்றாட வாழ்க்கையில் பல விஷயங்களுக்கு இது பொருந்தலாம். ஆனால், ஓய்வூதிய சேமிப்பில் மட்டும் இந்த அலட்சியத்தைக் காட்டினீர்கள் என்றால், அது உங்களது முதுமைக் காலத்தில் பெரிய சுமையாக மாறி உங்களை உலுக்கிவிடும். ஓய்வூதிய காலத்தை இப்போதே கவனமாகத் திட்டமிட்டால்தான் உங்கள் ஆயுள் முழுவதற்கும் வாழ்க்கை நிம்மதியாக அமையும். ஓய்வூதியத் திட்டமிடல் குறித்து உங்கள் மனதில் எழும் மிக முக்கியமான கேள்விகளுக்கான பதில்கள் இதோ:

எதிர்காலச் செலவுகளைத் துல்லியமாகக் கணிப்பதும், நமது ஆயுட்காலத்தை முன்கூட்டியே தீர்மானிப்பதும் ஓய்வூதியத் திட்டமிடலின் மிக முக்கியமான பகுதி. ஆனால், நமது ஆயுட்காலம் என்பது முற்றிலும் நமது கைகளில் இல்லாத ஒன்று. இப்படிப்பட்டச் சூழலில், நமக்குத் தேவையான சரியான ஓய்வூதியத் தொகையை (Corpus) ஒருவர் எவ்வாறு கணக்கிட்டு அடைய முடியும்?

ஓய்வூதியத்திற்குப் பிந்தைய செலவுகள், பணவீக்க விகிதம் மற்றும் ஆயுட்காலம் ஆகிய மூன்று விஷயங்கள் இதில் அடங்கியிருப்பதால், நமக்குத் தேவையான துல்லியமான தொகையைக் கணக்கிட முடியாது என்பது உண்மைதான்.

சேமிப்பை அதிகபட்சமாக உயர்த்துவதுதான் ஓய்வூதிய நிதியை கணக்கிடுவதற்கான வழி. அப்போதுதான் உங்களிடம் தேவைக்கு அதிகமாகவே பணம் இருக்கும். நீங்கள் 60 வயதில் ஓய்வு பெற்று 100 வயது வரை வாழ்வீர்கள் என்றும், உங்கள் அலுவலகத்திலிருந்து எந்த ஓய்வூதியப் பயன்களும் கிடைக்காது என்றும் வைத்துக்கொள்வோம். தற்போதைய மாதாந்திரச் செலவுகளுக்கு 6 சதவீதம் என்று பணவீக்கத்தைக் கணக்கில் வைத்துக்கொள்வோம் (நிதி ஆலோசகர்கள் வழக்கமாக இந்த பணவீக்கத்தையே கணக்கிடுவார்கள்). உதாரணமாக, உங்களுக்கு இப்போது 35 வயது ஆகவும் மாதச் செலவு 75,000  ஆகவும் இருந்து, நீங்கள் இன்னும் ஓய்வூதியத்திற்காகச் சேமிக்கத் தொடங்கவில்லை என்றால், ஒரு எளிய ஓய்வூதியக் கால்குலேட்டரைப் பயன்படுத்தும்போது உங்களுக்கு சுமார் 10 கோடி ரூபாய் முதல் 11 கோடி ரூபாய் வரை தேவைப்படும் என்பது தெரியவரும்.

யதார்த்த நிலை என்னவென்றால், பணியிடத்திலிருந்து உங்களுக்கு சில ஓய்வூதியப் பலன்கள் கிடைக்கப் பெறலாம். மேலும் நம்மில் பெரும்பாலோர் 100 வயது வரை வாழ்வதில்லை. 60 வயதிற்குப் பிறகும் நீங்கள் பணியைத் தொடரலாம் அல்லது ஓய்வுக் காலத்தில் பகுதிநேர வேலைகள் மூலம் வருவாய் ஈட்டலாம். அதுமட்டுமல்லாமல், பிற்காலச் செலவினங்கள் பெரும்பாலும் உங்கள் விருப்பத்திற்குரியதாக மாறிவிடும். அப்போது இஎம்ஐ அல்லது கல்விக்கட்டணம் போன்ற கட்டாயச் செலவுகள் இருக்காது. பிள்ளைகள் தனியாகக் குடியேறுவதாலோ அல்லது குடும்பப் பொறுப்புகளைப் பகிர்ந்துகொள்வதாலோ மாதாந்திர வீட்டுச் செலவுகள் குறையக்கூடும். இளமைக் காலத்திலிருந்தே முறையான மருத்துவக் காப்பீடு மற்றும் தீவிர நோய்களுக்கான பாதுகாப்புக் காப்பீட்டைப் பெற்றிருந்தால், ஓய்வூதிய நிதியும், பிற்காலச் செலவுகளும் திட்டமிட்ட வரம்பிற்குள்ளேயே இருக்கும்.

முக்கியக் குறிப்பு:

பிற்காலத்தில் தங்களின் தற்போதைய வாழ்க்கை முறையைத் தடையின்றித் தொடர்வதை நோக்கமாகக் கொண்டு, ஓய்வூதிய நிதிக்கான குறைந்தபட்ச மற்றும் அதிகபட்ச இலக்குகளைக் கணக்கிட 2-3 சூழல்களை பயன்படுத்துங்கள். உங்களின் நிஜமான நிதி நிலைக்கு ஏற்ப உங்களால் இயன்ற தொகையைச் சேமிப்பது அவசியமாகும். மேலும், ஓய்வூதியத்திற்கான நிதி ஒதுக்கீடு முற்றிலும் தனித்துவமானதாக இருக்க வேண்டும். அதை மற்ற தேவைகளுடன் இணைப்பதோ அல்லது பிற இலக்குகளுக்காக அதிலிருந்து நிதியைப் பயன்படுத்துவதோ தவிர்க்கப்பட வேண்டும்.

ஓய்வூதிய கால தேவைகளுக்காக நான் எங்கே முதலீடு செய்ய வேண்டும்?

ஓய்வூதிய கால சேமிப்பு என்பது நீண்ட கால அடிப்படையிலானது என்பதால் நிதியை உருவாக்கும் ஆண்டுகளில் பணவீக்கத்தை விட அதிக லாபம் தரும் ஈக்விட்டி சார்ந்த திட்டங்களில் முதலீடு செய்ய வேண்டும். இதற்கு மியூச்சுவல் பண்ட் வழிமுறை ஒரு சிறந்த தேர்வாகும். ஏனெனில் மாதாந்திர எஸ்.ஐ.பி(SIP) முறை உங்களின் முதலீட்டை ஆட்டோமேட்டிக் முறையில் மாற்றுகிறது. சிறிய தொகையாக இருந்தாலும் உங்களின் ஓய்வூதிய முதலீட்டை எவ்வளவு சீக்கிரம் முடியுமோ அவ்வளவு சீக்கிரம் தொடங்குங்கள்.

நடைமுறையில் மாதச் சம்பளம் வாங்கும் நம்மில் பெரும்பாலானோருக்கு இபிஎப்(EPF) பங்களிப்பு சம்பள அமைப்பிலேயே தானாக கழிக்கும்படி அமைக்கப்பட்டிருக்கும். இதுவும் நமது ஓய்வூதிய சேமிப்பிலேயே சேரும். இதுதவிர விபிஎப்(VPF) மற்றும் என்பிஎஸ்(NPS) ஆகிய முதலீடுகள் பழைய வரி முறையின் கீழ் வரி விலக்கு பெறுவதற்கும் ஓய்வு பெறும் போது அந்த ஒட்டுமொத்த தொகையை எடுக்கும்போது வரிச் சலுகைகளை பெறுவதற்கும் பிரபலமான தேர்வுகளாக இருக்கின்றன.

இருந்தாலும், ஓய்வூதிய நிதியைத் திரட்டும்போதோ அல்லது அதனைத் திரும்பப் பெறும்போதோ, வரியைச் சேமிப்பது மட்டுமே உங்களின் முதன்மை நோக்கமாக இருக்கக் கூடாது. மாறாக, வரிக்குப் பிந்தைய வருவாய் விகிதமானது, பணவீக்கத்தை விட அதிகமாக இருப்பதை உறுதி செய்வதே முக்கியம். உங்களின் சொத்துப் பகிர்வு (asset allocation), ஓய்வுக் காலத்திற்குப் பிந்தைய உங்களின் வாழ்வாதாரத் தேவைகள் மற்றும் ரிஸ்க் தாங்கும் திறன் (risk tolerance) ஆகியவற்றிற்கு ஏற்ப அமைந்திருக்க வேண்டும்.

முக்கிய குறிப்பு:

உங்கள் ஓய்வுக் காலத்தில் போதிய வருமானத்தை உறுதி செய்ய, முதலீட்டை எவ்வளவு சீக்கிரம் தொடங்க முடியுமோ அவ்வளவு சீக்கிரம் தொடங்குவதும், ஈக்விட்டிகளில் அதிகபட்சமாக முதலீடு செய்வதும் மிக அவசியமாகும். இல்லையென்றால், பிற்காலத்தில் நீங்கள் உங்கள் வாழ்க்கைத்தரத்தை விட்டுக்கொடுக்க வேண்டியிருக்கும். அல்லது அதிக லாபத்திற்காக ஓய்வுக் காலத்தில் தேவையை விட அதிக ரிஸ்க்குகளை எடுக்க வேண்டியிருக்கும். இல்லையெனில், நீங்கள் உயிரோடு இருக்கும்போதே உங்கள் ஓய்வூதிய நிதி முற்றிலும் தீர்ந்துபோகும் நிலை ஏற்படும்.

ஓய்வுபெறும் நிலையை நெருங்கும்போது உங்களின் முதலீட்டு லாபத்தை எவ்வாறு தக்கவைப்பது?

உங்கள் ஓய்வூதியச் சேமிப்பில் பெரும்பகுதியை நீங்கள் ஈக்விட்டியில் முதலீடு செய்திருக்கும்போது, ஓய்வுபெறும் காலத்திற்கு நெருக்கமான ஆண்டுகளில் அந்த லாபத்தை பாதுகாப்பது மிகவும் அவசியமாகும். ஓய்வுபெறுவதற்கு 2-3 ஆண்டுகளுக்கு முன்னதாக, சந்தை வீழ்ச்சியடைவதோ அல்லது ஏற்ற இறக்கத்துடன் இருப்பதோ (செப்டம்பர் 2024 முதல் பார்த்து வரும் சூழல் அல்லது கோவிட் கால சந்தை வீழ்ச்சி போன்ற நிலை), உங்களின் ஒட்டுமொத்த சேமிப்பைக் கரைப்பதுடன் தேவையற்ற மன அழுத்தத்தையும் ஏற்படுத்தக்கூடும்.

ஓய்வுபெறும் காலத்திற்கு நெருக்கமாக இருக்கும்போது, ஓய்வுக்குப் பிந்தைய முதல் 3 ஆண்டுகளுக்கு உங்களுக்கு எவ்வளவு பணம் தேவைப்படும் என்பதை மதிப்பிட்டு, அந்தத் தொகையை டெப்ட் ஃபண்டுகள் (Debt Funds) அல்லது இதர நிலையான வருமானம் தரும் பாதுகாப்பான திட்டங்களுக்கு மாற்றலாம்.  இந்தத் தேவையை மதிப்பிடும்போது, நீங்கள் ஓய்வு பெற்றவுடன் பயன்படுத்திக் கொள்ளக்கூடிய இ.பி.எஃப் (EPF) மற்றும் என்.பி.எஸ் (NPS) போன்ற உங்களின் மற்ற முதலீடுகளையும் மனதில் கொள்ளுங்கள்.

முக்கிய குறிப்பு:

உங்களது குறுகிய கால மற்றும் நடுத்தர காலத் தேவைகளுக்காக, ஈக்விட்டி மற்றும் ஈக்விட்டி மியூச்சுவல் ஃபண்டுகளில் இருந்து எந்த அளவிற்கு மற்றும் எப்படி லாபத்தை எடுக்கலாம், அதை எப்படி இன்னும் பாதுகாப்பான திட்டங்களில் மறுமுதலீடு செய்யலாம் என்பதைத் திட்டமிட ஒரு நிதி ஆலோசகரின் உதவியை நாடுங்கள்.

ஓய்வு பெற்ற பிறகு உங்களிடம் இருக்கும் மொத்த தொகையை ஈக்விட்டியில் (பங்குச்சந்தை சார்ந்த) முதலீடு செய்வதற்கான சிறந்த வழி என்ன?

பல முதலீட்டாளர்கள், ஓய்வுக் காலச் சேமிப்பை ஈக்விட்டியில் முதலீடு செய்வது அதிக ஆபத்து நிறைந்தது என்று நினைத்து, நிலையான வருமானம் தரும் திட்டங்கள் (fixed income) அல்லது ஆன்விட்டி (annuities) பக்கமே சாய்ந்துவிடுகிறார்கள். ஆனால், மனிதர்களின் சராசரி ஆயுட்காலம் அதிகரித்து வருவதாலும், சேவைகள் சார்ந்த பணவீக்கம் (உதாரணமாக மருத்துவம், சுற்றுலா மற்றும் பயணச் செலவுகள்) அதிகமாக இருப்பதாலும், ஓய்வுக்குப் பிந்தைய தேவைகளைச் சமாளிக்க உங்களுக்கு ஈக்விட்டியின் கூட்டு வட்டித் திறன் (compounding power) கண்டிப்பாகத் தேவைப்படும். அதற்காக நீங்கள் பின்பற்றத்தக்க ஒரு நடைமுறை உத்தி இதோ:

• அவசரகாலப் பணம் (திடீர் மருத்துவச் செலவுகள் போன்றவற்றுக்காக) மற்றும் அடுத்த 3 ஆண்டுகளுக்கான மாதாந்திரச் செலவுகளுக்குத் தேவைப்படும் தொகை ஆகியவற்றை டெப்ட் ஃபண்டுகள் (Debt Funds) அல்லது நிலையான வருமானம் தரும் (Fixed Income) திட்டங்களில் முதலீடு செய்து வைக்கலாம்.
• 3 வருடங்களுக்கு மேல் மற்றும் 5 வருடங்கள் வரை தேவைப்படும் நிதியை, அதிக ரிஸ்க் இல்லாத ஈக்விட்டி சார்ந்த திட்டங்களான ஆர்பிட்ரேஜ் ஃபண்டுகள், ஈக்விட்டி சேவிங்ஸ் ஃபண்டுகள், பேலன்ஸ்டு அட்வாண்டேஜ் ஃபண்டுகள் மற்றும் இதர ஹைப்ரிட் ஃபண்டுகளில் முதலீடு செய்து வைக்கலாம்.
• 5 ஆண்டுகளுக்கு மேல் தேவைப்படும் தொகையை, தொடர்ந்து முழுமையாக ஈக்விட்டி மியூச்சுவல் ஃபண்டுகளிலேயே (equity mutual funds) முதலீடு செய்து வரலாம்.
• அவசரகால நிதி மற்றும் குறுகிய காலத் தேவைகளுக்கான தொகையைக் கடன் சார்ந்த திட்டங்களில் (debt bucket) நிரப்ப, தேவைப்படும்போது ஹைப்ரிட் திட்டங்களில் (hybrid bucket) இருந்து மாற்றிக் கொள்ளலாம். அதே நேரத்தில், ஹைப்ரிட் திட்டங்களில் குறையும் தொகையை ஈக்விட்டி திட்டங்களில் (equity bucket) இருந்து எடுத்து நிரப்ப வேண்டும்.

முக்கிய குறிப்பு:

ஓய்வு காலத்துக்குப் பிறகு பங்குச்சந்தை சார்ந்த முதலீடு என்பது வெறும் தேர்வு அல்ல, அதுவொரு அவசியத் தேவையாகும். பொறுப்புடன் முதலீடு செய்யும் போது அது உங்களுக்கு நல்ல வாழ்க்கையை அளிக்கும். மாறாக, பொறுப்பற்ற முறையில் முதலீடு செய்தால், அது உங்கள் வாழ்நாளிலேயே உங்கள் மூலதனத்தை முழுமையாகக் கரைத்துவிடும் அபாயம் உள்ளது.

ஓய்வு பெற்ற பிறகு, நிலையான வருமானம் தரும் சேமிப்புத் திட்டங்களை (fixed income products) நான் எவ்வாறு தேர்ந்தெடுக்க வேண்டும்?

முன்பு குறிப்பிட்டது போல அடுத்த 3 ஆண்டுக்களுக்கான உடனடி தேவைகளுக்கு என்ன தொகை தேவையோ அதை மட்டும்தான் நிலையான வருமானம் தரும் திட்டங்களில் வைத்திருக்க வேண்டும். நீங்கள் டெபாசிட்டுகள், பாண்டுகள் போன்றவற்றில் முதலீடு செய்யும் போது அந்த சமயத்தில் என்ன வட்டி விகிதம் இருக்கிறதோ, அதான் உங்களுக்கு கிடைக்கும். எனவே, இந்த முதலீட்டு திட்டங்களை தேர்ந்தெடுக்கும் போது நீங்கள் மிகவும் சுதாரிப்பாகவும் சந்தைக்கேற்ப செயல்படுவதும் அவசியமாகும்.

நீங்கள் செய்ய வேண்டியவை:

-வட்டி விகிதங்கள் உச்சத்தில் இருக்கும்போது, வங்கி டெபாசிட்டுகள் அல்லது போஸ்ட் ஆபீஸ் சேமிப்புத் திட்டங்கள் மிகச்சிறந்த தேர்வாக இருக்கும். அதேபோல, வட்டி ஆதாயம் (yields) உச்சத்தைத் தொடும் சமயத்தில், நீண்ட கால அரசுப் பத்திரங்களிலும் (government securities) நீங்கள் முதலீடு செய்யலாம்.

– வட்டி விகிதங்கள் குறைவாக இருக்கும் காலங்களில் முதலீடு செய்யும் போது சற்று கூடுதல் ரிஸ்க் கொண்ட என்பிஎப்சி/கார்ப்பரேட் டெபாசிட்டுகள் அல்லது பாண்டுகள் திட்டங்களில் முதலீடு செய்துதான் நல்ல லாபத்தை தேட வேண்டியிருக்கும். அப்படி செய்யும் போது முதலீட்டின் மூலம் கிடைக்கும் லாபத்தை விட முதலீடு முக்கியம் என்பதை நினைவில் வைத்துக் கொள்ள வேண்டும். தேவையில்லாமல் அதிக ரிஸ்க் எடுக்க வேண்டாம்.

– ஃப்ளோட்டிங் ரேட் பாண்டுகளை (floating rate bonds) தேர்ந்தெடுப்பது, சந்தையின் போக்குடன் இணைந்து செயல்படவும், வட்டி விகித மாற்றங்களுக்கு ஏற்ப தடையின்றி பயணிக்கவும் உங்களுக்கு உதவும்.

முக்கிய குறிப்பு:

வெவ்வேறு கால அளவுகள் கொண்ட திட்டங்களில் கலந்து முதலீடு செய்யுங்கள். அப்போதுதான், போர்ட்ஃபோலியோவின் ஒரு பகுதியை நீண்ட காலத்திற்கு அதிக வட்டி தரும் திட்டங்களில் முதலீடு செய்ய முடியும். அதே நேரத்தில், மற்றொரு பகுதியை தற்போதைய சந்தை நிலவரம், உங்களின் பணத் தேவைகள் (பணவீக்கம் மற்றும் பிற தேவைகளால் செலவுகள் அதிகரிக்கும் போது, அதிக அளவிலான அசல் தொகை தேவைப்படும்) மற்றும் உங்கள் ரிஸ்க் எடுக்கும் திறன் ஆகியவற்றிற்கு ஏற்ப மாற்றி மாற்றி முதலீடு (churn) செய்ய முடியும்.

ஓய்வூதியத்திற்குப் பிந்தைய தேவைகளுக்கு நான் எப்படி SWP (Systematic Withdrawal Plan) முறையைப் பயன்படுத்த வேண்டும்?

உங்கள் முதலீட்டுக்கு பாதுகாப்பு அளிக்கும் டெபாசிட்டுகள் அல்லது பாண்டுகள் போன்ற திட்டங்களை போல் அல்லாமல் SWP முறையில் ஒரு குறிப்பிட்ட கட்டத்துக்கு பிறகு நம்முடைய அசல் தொகையிலிருந்தே பணம் திரும்ப பெறப்படுகிறது.

உங்களுக்கு இதில் உடன்பாடு இருந்தால், உங்களின் வழக்கமான வருமானத் தேவைகளைப் பூர்த்தி செய்ய டெபாசிட்டுகள்/பாண்டுகளுக்குப் பதிலாக அல்லது அவற்றுடன் சேர்த்தே டெப்ட் ஃபண்டுகளிலும் முதலீடு செய்யலாம். லிக்விட் பண்டுகள், மணி மார்க்கெட் பண்டுகள், குறுகிய கால பண்டுகள், கார்ப்பரேட் பாண்ட் மற்றும் பேங்கிங் & பிஎஸ்யு(PSU) டெப்ட் ஃபண்டுகள் போன்ற பல்வேறு பிரிவுகளில் உங்கள் முதலீட்டைப் பிரித்துப் போடலாம்.

என்ஏவி(NAV) கணிசமாக மாறுபடாத, வட்டி விகித அபாயம் மற்றும் கடன் அபாயம் ஆகிய இரண்டும் குறைவாக உள்ள மற்றும் வைப்புத்தொகைகளை விட சற்றே கூடுதல் வருவாய் ஈட்டக்கூடிய டெப்ட் பண்ட் பிரிவுகளில் முதலீடு செய்வதே இதன் முக்கிய நோக்கமாகும்.

இது உங்களது பணத்தை திட்டமிட்டப்படி மாதந்தோறும் திரும்பபெறுதலை உறுதி செய்வதுடன், உங்களின் மொத்த தொகையையும் (corpus) முன்கூட்டியே தீர்ந்துவிடாமல் பாதுகாக்கும். உங்களது செலவுகள் அதிகரிக்கும் போதோ மற்றும்/அல்லது இத்தொகை குறையும் போதோ, இந்த நிதிப் பிரிவை நீங்கள் மறுமதிப்பீடு செய்து மீண்டும் நிரப்பிக் கொள்ளலாம்.

முக்கியக் குறிப்பு:

உங்களது மூலதன நிதி (corpus) முன்கூட்டியே காலியாகிவிடாமல் தடுக்கும் அதே வேளையில், ஆண்டுதோறும் உங்களின் தேவைகளுக்குப் போதுமான நிதியை வழங்கக்கூடிய ஒரு பொருத்தமான திரும்பப் பெறும் விகிதத்தை (withdrawal rate) நீங்கள் கண்டறிய வேண்டும். வழக்கமாக, முதலீடு செய்யப்பட்டுள்ள நிதி வழங்கும் வருவாய்க்கு நிகரான தொகையைத் திரும்பப் பெறலாம் எனக் கருதப்படுகிறது. எனினும், அதற்கான உகந்த அளவு அதைவிடக் குறைவாக இருப்பதற்கே வாய்ப்புகள் அதிகம். இந்தத் திரும்பப் பெறும் விகிதமானது உங்களது மொத்த மூலதனம், உங்களின் செலவினங்களின் போக்கு, ஓய்வுக் காலத்திற்குப் பிந்தைய உங்களது பங்குச்சந்தை சார்ந்த முதலீட்டு ஒதுக்கீடு (equity allocation) மற்றும் ஆயுள் எதிர்பார்ப்பு ஆகிய பல்வேறு காரணிகளின் அடிப்படையில் அமைகிறது. எனவே, உங்களுக்கான ‘பாதுகாப்பான திரும்பப் பெறும் விகிதத்தை’ (safe withdrawal rate) உங்களது நிதி ஆலோசகருடன் கலந்தாலோசிப்பது மிகவும் அவசியமாகும்.